Ինչպե՞ս ընտրել ամանորյա նվերներ երեխաների համար․ 4 նվերի կանոն

Տոներն արդեն մոտենում են և ծնողները փորձում են ևս մեկ տարի հիշարժան դարձնել իրենց երեխաների համար։ Որոշ երեխաներ մտածում են ինչ խնդրել Ձմեռ Պապիկից, ոմանք՝ ծնողներից, իսկ որոշները նույնիսկ հույս չունեն, որ որևէ նվեր կստանան։

Տարեցտարի կարծես դժվարանում է երեխաների համար նվերներ ընտրելը։ Երբ փոքր էինք, մեզ համար մեր ծնողներն ընտրում էին այն ինչի կարիքն ունեինք կամ ինչ կկարողանային հայթայթել, իսկ այսօր երեխաները գրեթե ոչնչի կարիք չունեն, այսինքն՝ երբ որևէ բանի կարիք կա՝ անմիջապես ձեռք ենք բերում, չենք սպասում հատուկ առիթի։

Նվերների ընտրության համար մի հետաքրքիր մոտեցման հանդիպեցի մի քանի շաբաթ առաջ,  որը մտածելու տեղիք տվեց և որի մասին ուզում եմ պատմել։ 

Մեր թաղամասում մամաների ակումբ կա, որի վերջին հանդիպումը նվիրված էր խաղալիքների և գրքերի փոխանակմանը։ Այսինքն, այն գրքերը և խաղալիքները, որոնք այլևս հետաքրքիր չեն երեխաներին, չեն օգտագործում, տանում ենք և փոխանակում ենք մյուս մամաների բերած իրերի հետ, իսկ մնացած չընտրված իրերը հյուրընկալողը տանում է որևէ բարեգործական կազմակերպության է տալիս։ Այդ հանդիպման ժամանակ զրուցեցինք ամանորյա նվերների, տանը չափից շատ խաղալիքների մասին և մամաներից մեկը պատմեց նվերներ ընտրելու հետևյալ կանոնի մասին։

Որո՞նք են 4 նվերի կանոնները

նվիրել՝

1. մի բան, որը երեխան ուզում է

2. որևէ բան, որի կարիքն ունի 

3. հագնելու մի բան 

4. կարդալու բան 

Ես ինքս ավելացրել եմ հետևյալ մի քանի կետերը, որոնք հավանաբար կարելի է ներառել վերևի կանոններում, այնուամենայնիվ առանձնանցում եմ՝

5. նվիրել որևէ ստեղծագործական զբաղմունք (նկարելու, կարելու, գործելու, ուլունք սարելու հավաքածուներ, մոզայկա, պազլ, պլաստիլին և այլն)

6. Եթե ընտանիքում կան մեկից ավել երեխաներ, կարծում եմ կարևոր է նաև պահպանել արդարությունը, անկողմնապահությունը (մեկին չնվիրել հեռախոս, մյուսին՝ մատիտներ)

7. ընտրել նվեր տարիքային առանձնահատկությունները հաշվի առնելով

8. նվիրել սեփական ձեռքով պատրաստած բան, որի միջոցով երեխան կիմանա, որ նվերը պարտադիր չէ լինի գնված, կսովորի, որ նվերը կարող է լինել նաև ձեռքի աշխատանք։

9. թանկ նվերները պետք չէ վերագրել Ձմեռ Պապիկին․ թող իմանան, որ ծնողներն են նվիրել:D 

10. տոներից հետո պետք չէ երեսով տալ նվերները, թե այդքան բան ենք նվիրել,  թանկ խաղալիք ենք առել, բայց չես գնահատում, չես լսում։ 

4 նվերի կանոնի օգնությամբ շատ ծնողներ կարողանում են սահմանափակվել և կողմնորոշվել, թե ինչ գնեն։ Ինչպես նաև, այն կարող է լինել լավ ուղեցույց այն հարազատների համար, ովքեր հարցնում են, թե ինչ նվիրեն Ձեր երեխային։

Հավանաբար տեղյակ եք, որ աշխարհի շատ երկրներում նվերները միմյանց տալիս են Սուրբ Ծննդին։ Երևի մեզ մոտ Ամանորին ենք տալիս, քանի որ երկար տարիներ Սովետական Միության ազդեցության տակ ենք եղել, ինչպես նաև Ամանորն ավելի շուտ ենք նշում քան Սուրբ Ծնունդը։ 

Ինչևէ, ուզում եմ նաև նշել մի հետաքրքիր ու ինձ համար շատ գրավիչ իսլանդական ավանդույթի մասին Jólabókaflóð - Սուրբ Ծննդի գրքի հեղեղ։ Սուրբ Ծննդի նախoրեին բոլորն իրար նվիրում են գիրք և ընթերցում են այդ երեկոյի ընթացքում (տարօրինակ մարդիկ են․ ո'չ բլինչիկ, ո'չ բուդ ։D)։ Կարծում եմ, վատ չի լինի ներմուծել նման գեղեցիկ ավանդույթ։

Ամենակարևորն այն է, որ այս տոնական օրերին հիշենք, որ կան բազում երեխաներ, ովքեր այս տոներին ոչինչ չեն ստանալու, չմոռանանք նաև նրանց։ Եթե որևէ բան գնեք ձեր երեխայի համար, մի փոքրիկ խաղալիք, իր էլ գնեք մի կարիքավոր երեխայի համար։ Կարծում եմ հնարավոր է գտնել որևէ վստահելի կազմակերպության, մարդկանց, ովքեր օգնում են անապահով ընտանիքներին։ Գուցե և ձեր շրջապատում, երեխայի դասարանում նման երեխա լինի, որի համար մի փոքր ուշադրությունը տոն կստեղծի։ Եթե կարող եք, ապա այլ երեխայի համար նվերը գնեք, նվիրեք կամ փոխանցեք Ձեր երեխայի հետ։ Այդպես նա նաև կսովորի լինել բարեսիրտ, կարեկցող, սեփական եսից բացի այլ մարդկանց մասին մտածող։ 

Բոլորին մաղթում եմ հաճելի և հեքիաթային տրամադրությամբ լի Ամանորյա և Սուրբ Ծննոդյան տոներ։ 

Իսկ դուք ինչպե՞ս եք առաջնորդվում նվերներ ընտրելիս։